﻿Wrkapm ep a Pol nira eng Timoti.
1.
Kupm Pol, kupm melnum wokgen akwapel a Krais Sisas. Maur Wailen a pikekg awi mentepm ti aye kai eng alkilen pa, a wa Wailen Krais Sisas kil melnum a mentepm ukipma rpma nungkwangen la riwel pa, tuwekg pikekg takweiyopm la kupm melnum wokgen akwapel a tuwekg. 
Kupm nira wrkapm kil eng kitn Timoti pake. Kupm pikekg angklinseitn atom kitn ukipma atom kitn palng kol warim akupmen aklale. Kupm asen Yan Maur Wailen pa wa nampokgen Wailen Krais Sisas a mentepmen pa eng mpa tuwekg plan ipma wor ngklinseitn, a ntokg ipma akitnen pa rki meen wor. 
Kil kupm la lanikeitn or wrikel yangkipm a pikekg kupm lanakeitn ep ak wang a kupm la kaino anong kanokg Masetonia pa la, kitn rpmi anong Epesus pa, eng mpa kitn ri la tu melnum a kaling plan yangkipm ur manet a ake kai katila yangkipm a Maur Wailen pa, pa kitn mpa la ok titnongket ngkengken eng ampake tu ik kolpa. Ti kupm la wa tilpeitn titnongket nti ur la kitn ik kolpa kai o! 
Wa kupm la wa tilpeitn or wrikel la kitn laniken eng mpa tu elngen a tu akwonalmpen akorla por kweikwei a kolpa a wa tu ak ker awiye nang a tu mamikg mamin mansan atuwen pa. Eng ntei, tu ik kolpa pa mpa wa ak antokg tu alntu pa wa alupm nikgwalpm watipmen nolangkil tita eng kweikwei a kolpa. Wa ake mpa wa ik ngklin tu melnum pa eng tu ikwonilmpen ya wor a Maur Wailen akwlenten la uwiyen eng alkilen. Melnum a uk ipma Krais pa kolti antiwe ore ya pa. 
Pake yiprokgen a kupm ti lanakeitn la kitn laniken titnongket a ngkengken kolpa pa itna kolkil: kupm wasrongen la tu mpa rkul nikgwalpm a plan ipma wor wasrongen tita iklale. Kol nol nikgwalpm atuwen pa mpa rki kukula wriwen wor kolti, wa kol ok wusok atuwen pa mpa iktitnongketelen la tu ake antokg paipm ur, wa kol tu mpa ukipma Sisas pa iklale, tu kutnun nikgwalpm kolpa pipa, pa ak angklin tu atom tu antiwe arkul nikgwalpm a plan ipma wor wasrongen tu melnum. 
Tu melnum tiur pa, tu am pikekg kai ar or ya manet atnuurng nikgwalpm wor kolpa yat ise, atom anel rka akor la yangkipm tiur a ake ak angklin melnum ur kolai pa, kalpis. 
Tu wasrongen la tu ti melnum a kaling plan yangkipm titnongket a Maur Wailen naki tu wrong kin kipman, pake tu alntu ti ake wa ariwe yiprokgen a yangkipm a tu kaling planten a lanaken la pa yangkipm aklale pa. 
Pake mentepm ti pa, mentepm ariwe la kuina ur nira ela yangkipm titnongket pa wor a ak angklinso. Kol melnum ur kil kiling plan yangkipm titnongket pa riworwor pa, yangkipm titnongket pa wor. 
Wa mentepm wa ariwe la, yangkipm titnongket pa ake itna eng la ik ngketen tu melnum a antokg kuina ur a wor pa, kalpis. Pa itna eng la ik ngketen tu melnum paipm kolkil: - tu melnum a talpulng yangkipm, - tu melnum a ake la orngwatneikgen melnum ur aki yangkipm titnongket ur, - tu melnum a itna watin eng Maur Wailen, - tu melnum a antokg paipmpaipm, - tu melnum a ake katnun nikgwalpm ute wor a Maur Wailen, - tu melnum a ake ngkark orngwatneikgen Maur Wailen ti, - tu melnum a alm man alntu amo a tu melnum a alm yan alntu amo, - tu melnum a alm melnum amo, - 
wa tu kin a kipman a angkli arkul tita, - wa tu kin a anti tu kin okg kinkipman, a tu kipman a anti tu kipman okg kinkipman, - tu melnum a arkul ak ikgwampel melnum manet ur ai aye kai eng akawi marpm, - tu melnum a kansil, - tu melnum a naren Maur Wailen aki wrik om aki kweiur kolpa eng ak titnongketel yangkipm kansil atuwen pa, - wa tu melnum a antokg kweikwei tiur manet kolpa a ak angketen yangkipm wor aklale a Maur Wailen a mentepm kaling plan pa. Yangkipm titnongket pa am elng itna la ik lok tu melnum a antokg paipm kolpake. 
Kol mentepm uwi yangkipm titnongket pa ik titnongketel a ik lok tu melnum pa riworwor kolpa pa, yangkipm titnongket pa wor a ak angklinso. Wa Yangkipm titnongket pa am kai irir yangkipm wor a la Krais a pikekg Maur Wailen elngkul kupm ti la kupm laron tike. Yangkipm wor pa lanako la Maur Wailen pa kil antiwe titnongket klalen wail manten, atom mentepm mpa ngkit nang akilen pa iye kaino kwa. 
Kupm uk wor Krais Sisas Wailen almentepmen, melnum a alkopm alkopm titnongket pa eng kil pikekg ariwopm la kupm ti nungkulkg wor antiwe ikga ikwap wor, kolpa atom kil pikekg takweiyopm la kupm ikwap akilen pa. 
Aklale, pikekg ep pa kupm melnum pikekg itna kalnten awi wrongmanto lan tu a ukipma Sisas pa atom or ungkwan aknokgel tu pa, pati atnen a kupm ake pikekg ukipma kil pa a wa kupm ake pikekg ariwe kuina ur a kupm antokg pa, kalpis. Kolpa atom ari kil plan ipma arein alkil pa ak angklinsopm 
Wailen a mentepmen pa kil plan ipma wor areinsopm wail manten paipm wrisen or kai ai. Pa ak angklinsopm, atom kupm ukipma kil a wa kupm plan ipma wor wasrongen tu wrongkwail. Am Krais Sisas pa kil alkopm nikgwalpm kolpake. 
Mentepm wrongkwail antokg paipmpaipm, pake kupm kil pa melnum paipm wrisen a pikekg antokg paipmpaipm angkomis or kai ai. Pake Krais Sisas kil pikekg nar kanokg ti eng ak awi mentepm melnum a antokg paipmpaipm. Kil yangkipm a mentepm atning atning a tu laron nako nako pa. Pa yangkipm wor aklale wrisen a kol a mentepm ukipma kutnun riworwor iye kimeket pa pati, kol a wor wrisen. 
Pikekg Sisas Krais kil arkul itna nungkwangen mentepm melnum a antokg paipm kolti. Kil la plan ipma wor alkil pa rein mentepm ti, kolpa atom ari kil plan ipma wor alkil pa arein kupm ti, kupm ti melnum paipm wrisen or kai ai. Kolpa atom kil elng kupm ti itna kol mrangkum ur a ikga tu melnum paipm kolai kolai ikga tu ri pa, tu riwe la, kil ikgam wa rkul ipma itni nungkwangen tu pa yat pake, la tu ukipma kil pa, tu ikga uwi yaprekg watin a rpma yongkyong. 
Kil pa Maur Wailen, ake Maur Wailen ur manet rpma, kalpis, kil alkil wris pa kolti. Kil melnum tukgunakg a rpma yongkyong, a kil ikgake imo, wa melnum ur ake ari kil pa, kalpis. Ti mpa mentepm ngkit nang a kil alkil wris ita pa iye kaino kwa ikngklei wang itni iye or pa kai pake! Aklale wrisen. 
Timoti, kitn kol warim kipman alkupm a mentekg ukipma Krais, kupm alkeitn yangkipm a ela wrkapm kil la kitn ikwap kitila rpmi kai pa. Yangkipm kil kai katila yangkipm a pikekg Maur Wor a Maur Wailen ngkat okel tunteng melnum okwripm la kitn pa ep ak ai la ikga kitn ik pa. Ti kol a kitn lupmen yangkipm a pikekg tunteng aktitnongkeleitn pa rpmi kawor ipma akitnen. Pa kol wri wamung ur eng mpa kitn ik rapon riworwor, atom mpa kitn ik ngketen yangkipm manet a tu tiur kaling planten pa. 
Kitn ilmpwrong itni kolpa kai pa, kitn mpa rkul a kitn ukipma Sisas pa, a kitn kutnun ok wusok alkitn a alokeitn la kitn itn a rpmi wriwen wor pa. Kitn rkul kweikwei wekg pa iye itni titnongket ik rapon kolpa iye kai. Tu tiur a pikekg ukipma pa tu pikekg talpulng ok wusok alntu a aloken pa, atom tu angko kai antokg paipmpaipm. Atom a tu ukipma pa kolen wan unokgen a kai al atne wes atom tapor kai paipm pa. 
Imeneus a Aleksanter pa tuwekg melnum wekg ur a pikekg talpulng ok wusok a aloken pa atom a tuwekg ukipma pa kai paipm kolpa. Kolpa atom kupm elng tuwekg pa kai wam a Satan pa eng kil lken wleket, eng mpa tuwekg uwi riwe paipm a tuwekg antokg pa, eng ake mpa tuwekg la ik nokgel nang a Maur Wailen pa. 
