﻿MAHI.
15.
Nā, ka tae iho ētahi tāngata i Hūria ka whaka­ako i ngā tēina, “Ki te kore koutou e kotia, kia rite ki tā Mohi, e kore koutou e taea te whaka­ora.” 
Nā, kīhai i iti te whawhai, te uiui a Paora rāua ko Pānapa ki a rātou, ka whaka­ritea ko Paora, ko Pānapa, ko ētahi atu hoki o rātou, e haere ki ngā āpō­toro, ki ngā kaumātua ki Hiruhārama, mō tēnei pūtake. 
Heoi, āra­hina ana rātou e te hāhi haere ana rā Pini­kia, rā Hamaria kōrero ana i te tahuri­tanga o ngā tauiwi, ā, hoatu ana e rāua he hari nui ki ngā tēina katoa. 
Ā, nō tō rāua taenga ki Hiruhārama ka whaka­manu­hiri­tia rāua e te hāhi, e ngā āpō­toro hoki rātou ko ngā kaumātua, ka kōrero­tia ngā mea i mahi tahi ai te Atua me rāua. 
Nā, ko te whaka­tikanga o ētahi tāngata whaka­pono nō te tītore­hanga ki ngā Parihi, ka mea, “Me kokoti rātou, me ako hoki kia whaka­ritea te ture a Mohi.” 
Nā, ka hui­hui ngā āpō­toro rātou ko ngā kaumātua ki te whaka­aro ki tēnei mea. 
Ā, ka nui te tau­tohe­tohe, ka whaka­tika a Pita, ka mea ki a rātou, “E ngā tuā­kana, e mātau ana koutou ki te whiri­whiringa a te Atua i mua rawa i roto i a koutou, ko tōku māngai e rongo ai ngā tauiwi i te kupu o te rongo­pai, e whaka­pono ai hoki. 
I whaka­ae hoki ki a rātou te Atua e mātau nei ki ngā ngākau, i a ia i hoatu ai i te Wairua Tapu ki a rātou, rite tahi ki tāna ki a tātou; 
kāhore hoki i puta kē tōna whaka­aro ki a tātou, ki a rātou, i ō rātou ngākau kua mā i a ia i runga i te whaka­pono. 
Ko tēnei, he aha koutou ka whaka­mā­tau­tau ai i te Atua, ka whaka­takoto ioka ai ki te kakī o ngā ākonga, he mea kīhai nei i taea te mau e ō tātou mātua, e tātou rānei? 
Heoi, ka whaka­pono nei tātou, tērā tātou e ora i runga i te aroha noa o te Ariki, o Īhu Karaiti, ka pērā tahi hoki me rātou.” 
Nā, noho puku ana te mano katoa, whaka­rongo ana ki a Pānapa rāua ko Paora e kōrero ana i ngā tohu, i ngā mea whaka­mīharo i mea ai te Atua kia mahia e rāua i roto i ngā tauiwi. 
Ā, ka mutu tā rāua ka whaka­hoki a Hēmi, ka mea: “E ngā tuā­kana, whaka­rongo ki ahau! 
Kua kōrero­tia e Himiona tā te Atua tiro­hanga mai i mua, tāna tango­hanga i tētahi iwi i roto i ngā tauiwi mō tōna ingoa. 
E rite ana anō ki tēnei ngā kōrero a ngā poro­piti; i tuhi­tuhia rā: 
‘I muri o ēnei mea ka hoki mai ahau, ka hangā anō e ahau te ta­pe­nā­kara o Rāwiri, kua hinga nei; ka hangā anō e ahau ōna wāhi kua horoa, ā, ka whaka­ara­hia e ahau. 
Kia rapu ai ngā toenga o ngā tāngata ki te Ariki, me ngā tauiwi katoa hoki i karanga­tia nei tōku ingoa ki runga ki a rātou, e ai tā te Ariki, e mahi nei i ēnei mea katoa. 
Nāna nei i mea kia mōhio­tia ēnei mea katoa nō te tīma­tanga rā anō o te ao.’ 
“Nā, ko tōku whaka­aro tēnei; kia kaua e whaka­rarua te hunga e tahuri ana mai ki te Atua i roto i ngā tauiwi; 
engari, kia tuhi atu tātou ki a rātou, kia mawehe atu rātou i ngā poke o ngā whaka­pakoko, i te moe tāhae, i te mea kua nōtia te kakī, i te toto. 
Nō ngā whaka­tupu­ranga hoki ō mua ngā kai­kauwhau i a Mohi i tēnei pā, i tēnei pā, he mea kōrero i roto i ngā whare kara­kia i ngā hāpati katoa.” 
Kātahi, ka pai ngā āpō­toro rātou ko ngā kaumātua me te hāhi katoa, kia whiri­whiria ētahi tāngata i roto i a rātou kia tonoa hei hoa mō Paora rāua ko Pānapa ki Anatioka; a Hūrā, i huaina nei ko Pāhapa, rāua ko Hira, he hunga ingoa nui i roto i ngā tēina, 
ka tuhia hoki ēnei mea hei mau­ranga: “Nā ngā āpō­toro rātou ko ngā kaumātua, ko ngā tuā­kana, ki ngā tēina o roto i ngā tauiwi, i Anatioka, i Hīria, i Kiri­kia; tēnā koutou. 
Nā, ka rongo nei mātou, tērā ētahi i haere atu nei i a mātou, i whaka­raru i a koutou ki ngā kōrero, i whaka­pōhēhē i ō koutou ngākau, kāhore nei ā mātou kupu ki a rātou. 
Kotahi tonu tō mātou whaka­aro he pai kia whiri­whiria ētahi tāngata, kia tonoa atu ki a koutou, hei hoa mō ā mātou tāngata e aroha nei, mō Pānapa rāua ko Paora; 
he hunga i tuku nei i a rāua ki te mate hei mea mō te ingoa o tō tātou Ariki, o Īhu Karaiti. 
Nā, kua tonoa atu nei e mātou a Hūrā rāua ko Hira, mā rāua hoki e kōrero a kupu atu aua mea anō. 
I pai hoki ki te Wairua Tapu, ki a mātou hoki, kia kaua e utaina ki a koutou tētahi atu whaka­tai­maha, ko ēnei mea tika anake; 
kia mawehe koutou i ngā mea e patua ana mā ngā whaka­pakoko, i te toto, i te mea kua nōtia te kakī, i te moe tāhae. Ka tiaki koutou i a koutou i ēnei mea, ka pai tā koutou mahi. Kia ora koutou.” 
Ā, nō tō rātou tuku­nga atu, ka haere ki Anatioka. Nā, ka hui­huia te mano, ka hoatu te puka­puka. 
Ā, ka oti te kōrero, ka koa rātou mō te kupu whaka­hauora. 
Nā, he maha ngā kupu a Hūrā rāua ko Hira i whaka­hau ai, i whakaū ai i ngā tēina; he poro­piti hoki rāua. 
Ā, ka roa iho rāua ki reira, ka tukua rāua e ngā tēina i runga i te rangi­mārie ki te hunga nāna rāua i tono atu. 
Heoi, i pai a Hira kia noho ki reira. 
Ko Paora ia rāua ko Pānapa i noho i Anatioka, i whaka­ako, i kauwhau i te kupu a te Ariki, rātou tahi ko tērā hunga toko­maha. 
Nā, muri iho i ētahi rā ka kī atu a Paora ki a Pānapa, “Tāua ka hoki, ka tiro­tiro i ngā tēina i ngā pā katoa i kauwhau­tia ai e tāua te kupu a te Ariki, i tō rātou pēhea­tanga.” 
Ā, ka mea a Pānapa kia mauria hei hoa a Hoani, e huaina nei ko Māka. 
Otiia, kīhai a Paora i pai kia haere i tō rāua tira te tangata i whaka­rere rā i a rāua i Pamapu­ria, kīhai hoki i haere tahi me rāua ki te mahi. 
Heoi, nui atu tō rāua nga­ngare, mawehe ai rāua i a rāua, ā, mauria ana e Pānapa a Māka, rere ana ki Kai­peru. 
Nā, tango ana a Paora i a Hira, haere ana, he mea tuku ki te aroha noa o te Atua e ngā tēina. 
Ā, haere ana ia rā Hīria, rā Kiri­kia, whakaū ana i ngā hāhi. 
